Rud Nua do Pharlaimint na hEorpa – An Chéad Toscaireacht a Rinneadh as Gaeilge Riamh

NÍ FÉIDIR beag is fiú a dhéanamh den dul chun cinn ar son na Gaeilge atá á dhéanamh ag Liadh Ní Riada agus Feisirí Eorpacha Shinn Féin.

Le linn Sheachtain na Gaeilge 2015, chuaigh Liadh i ngleic le húdaráis na hEorpa nuair a thug sí faoi stailc teanga sa Pharlaimint féin. D'éiligh sí a cearta teanga agus dhiúltaigh sí ach Gaeilge a labhairt, bail ó Dhia uirthi. Thug sí aird nach beag ar chás na Gaeilge thall sa Bhruiséil agus i Strasbourg, gan trácht ar an suim a tógadh abhus agus i measc na meán idirnáisiúnta.

Ní iontas é go bhfuil sí féin agus foireann Shinn Féin san Eorap ag briseadh talamh úr arís i rith Sheachtain na Gaeilge.

 Chun tús a chur le Seachtain na Gaeilge 2016, shocraigh Liadh daltaí ó 6 ghaelscoil éagsúla a thabhairt chun na hEorpa. Bhí deis ag na scoláirí, a tháinig as Cúige na Mumhan agus as Contae Chill Chainnigh, páirt a ghlacadh i sraith imeachtaí oideachasúla a chuir i ról an fheisire féin iad.

Bhí siad i mbun díospóireachta i leith ghéarchéim na dteifeach agus páirteach i gcainteanna idirghníomhacha ar mhórcheisteanna na linne agus na reachtaíochta. Rinne siad idirbheartaíocht agus vótáil le linn cluichí rólimeartha agus ríomhaireachta agus iad ag baint leasa as na seirbhisí iontacha nua-aimseartha atá anois ar fáil i bParlaimint na hEorpa.

Údar bróid atá ann gur féidir le Sinn Féin a leithéid den sár-imeacht seo a eagrú do Sheachtain na Gaeilge, dá ndéarfainn é. Cad é an rud is suntasaí faoi seo ar fad, áfach?

Is é seo an chéad toscaireacht a bhain úsáid as na seirbhísí Parlamentarium trí mheán na Gaeilge riamh. Sea, is é seo an chéaduair ab fhéidir le grúpa ar bith tairbhe a bhaint as na seirbhísí seo as Gaeilge i bParlaimint na hEorpa.

Tá gach seans ann nach dtarlódh sé ach ab é an obair a dhéanann Liadh agus ár bhfoireann gach lá. Leanann an páirtí ar aghaidh leis an obair chun stadás na Gaeilge a fheabhsú agus chun a chinntiú nach rachaidh an Chomhairle Eorpach siar ar a focal Maolú na Gaeilge a thabhairt chun deiridh.

Céim bheag chun tosaigh is ea na seirbhísí Gaeilge seo a cuireadh ar fáil do na Gaeil óga. 

Is maith an rud é go bhfuil daoine a bhfuil an mianach agus an croí ceart acu tofa san Eoraip againn. Is léir go bhfuil an Ghaeilge go fóill ina ábhar ríthábhachtach.